ഇന്ത്യയിലല്ലാതെ ലോകത്ത് ഒരു രാജ്യത്തും ആ രാജ്യത്തിന്റെ രാഷ്ട്രനിർമാണത്തിനായി ജീവിതം സമർപ്പിച്ച മനുഷ്യനെ കൊലചെയ്ത കക്ഷികൾ രാജ്യം ഭരിക്കുന്നുണ്ടാകില്ല.

January 29, 2023

രക്തസാക്ഷിയായി മുക്കാൽനൂറ്റാണ്ട് പിന്നിടുമ്പോഴും രാജ്യത്തെ ഏറ്റവും സജീവചൈതന്യമായി, സൂര്യതേജസ്സോടെ മഹാത്മജി ജീവിക്കുന്നു. നാഥുറാം വിനായക് ഗോഡ്‌സെയുടെയോ കൂട്ടാളികളുടെയോ തോക്കുകൾക്ക്, അവർ പ്രതിനിധാനംചെയ്യുന്ന ദുഷ്ടബോധത്തിന് ഇന്ത്യയുടെ ആ ആത്മാവിനെ എന്നന്നേക്കുമായി നശിപ്പിക്കാനാവാത്തതിന്റെ നൈരാശ്യവും പകയുമാണ് ഇപ്പോഴും ആവർത്തിക്കുന്ന പ്രതീകാത്മക വെടിയുതിർക്കലുകൾ. ഗാന്ധിജിയല്ല ഇന്ത്യയുടെ ഇപ്പോഴത്തെ രാഷ്ട്രപിതാവെന്നും വേണമെങ്കിൽ മുൻകാല രാഷ്ട്രപിതാവെന്ന്‌ വിശേഷിപ്പിച്ചോളൂ എന്നുമുള്ള ആശയം ചിലർ അഴിച്ചുവിടുന്നതും മഹാത്മാവ് ഇന്ത്യൻ മനസ്സിൽ ഊർജവും വെളിച്ചവുമേകി നിൽക്കുന്നതിൽ വിറളിപൂണ്ടാണ്.

സ്വന്തം ജീവിതത്തെ സത്യാന്വേഷണത്തിനും നീതിക്കുള്ള പോരാട്ടത്തിനുമായി ഉഴിഞ്ഞുവെച്ച ഗാന്ധിജിയെക്കുറിച്ച് ഐൻസ്റ്റൈൻ അദ്ഭുതാദരത്തോടെ പറഞ്ഞത് ഇങ്ങനെയൊരു ജീവിച്ചിരുന്നുവെന്ന് ഭാവിലോകം വിശ്വസിച്ചേക്കില്ലെന്നാണ്. വരിയിലെ ഏറ്റവും പിന്നിലുള്ളവരെക്കുറിച്ചാണ് ഗാന്ധിജി വേവലാതിപ്പെട്ടത്.
ഉടുക്കാനും പുതയ്ക്കാനുമില്ലാത്തവരോട് കോട്ടും തൊപ്പിയുമണിഞ്ഞ് സംസാരിക്കുന്നതിന്റെ വൈരുധ്യം മനസ്സിലാക്കിയ നിമിഷത്തിൽത്തന്നെ നഗ്നതമറയ്ക്കാനുള്ള ഒറ്റമുണ്ടിലേക്കുമാറിയപ്പോൾ ബ്രിട്ടീഷ് കൊളോണിയൽ ഭരണാധികാരികൾ അർധനഗ്നനായ ഫക്കീർ എന്ന് പരിഹസിച്ചത് വലിയ ബഹുമതിയായാണ് അദ്ദേഹം കണ്ടത്, വിദേശവസ്ത്ര ബഹിഷ്‌കരണസമരത്തിന്റെ പ്രതീകം. വർണവിവേചനത്തിനെതിരേ ദക്ഷിണാഫ്രിക്കയിൽ ദീർഘകാലസമരം നടത്തി ഭാഗികവിജയം നേടിയാണ് ഗാന്ധിജി ഇന്ത്യയിലേക്ക് മടങ്ങി ദേശീയ പ്രസ്താനത്തിന്റെ നായകനായത്.തുടക്കത്തിൽ രാഷ്ട്രീയാധികാരത്തിനുള്ള മുദ്രാവാക്യമുയർത്തുന്നതിനു പകരം ചൂഷണവിരുദ്ധസമരത്തിനാണ് ഗാന്ധിജി നേതൃത്വം നൽകിയത്. ബിഹാറിലെ ചമ്പാരനിൽ ബ്രിട്ടീഷ് ഏജന്റുമാരുടെ കൊടിയചൂഷണത്തിനിരയാകുന്ന നീലം കൃഷിക്കാർക്കൊപ്പം താമസിച്ച് അവരെ സംഘടിതരാക്കി സത്യാഗ്രഹം എന്ന നൂതനസമരമാർഗം തുറന്നാണ് ഐതിഹാസിക യാത്രയുടെ തുടക്കം.

ആർക്കും കോരിയെടുത്തുപയോഗിക്കാമെന്നു കരുതിയ സമുദ്രജലം ഗാന്ധിജി കോരിയെടുത്ത് കുറുക്കിയപ്പോൾ ലോകം അന്നേവരെ കണ്ടതിൽവെച്ചേറ്റവുംവലിയ നികുതിനിഷേധ നിയമലംഘനസമരമായി.

ഹിംസയെ അഹിംസാമന്ത്രംകൊണ്ട് നേരിടുന്ന സത്യാഗ്രഹവും ഉപവാസവുമാണ് ലോകത്തിന് ഗാന്ധിജി കാണിച്ചുകൊടുത്ത സമരമാർഗം. ഇന്ത്യൻജനത ക്വിറ്റ് ഇന്ത്യ എന്ന് ഉദ്‌ഘോഷിച്ചപ്പോൾ വെടിവെച്ചും തല്ലിയും തളർത്താൻശ്രമിച്ച ബ്രിട്ടീഷ് കോയ്മയ്ക്ക് അഞ്ചുവർഷത്തിനകം അധികാരം ഉപേക്ഷിച്ചുപോകേണ്ടി വന്നു. നിറത്തിന്റെയും വംശത്തിന്റെയും ധനത്തിന്റെയും പേരിലുള്ള ഉച്ചനീചത്വവും വിവേചനവുമാണ് ഗാന്ധിജിയെ എന്നും അലട്ടിയത്. ഹരിജനോദ്ധാരണ പ്രവർത്തനവും മതസ്പർധയ്ക്കെതിരായ പ്രവർത്തനവും ഹിന്ദുമുസ്‌ലിം ഐക്യം വളർത്തലും ദേശീയപ്രസ്ഥാനത്തിന്റെ അവിഭാജ്യമായ ഭാഗമാണെന്നു കണ്ടുകൊണ്ടാണ് അദ്ദേഹം തന്റെ പ്രവർത്തനം ആസൂത്രണം ചെയ്തത്.
മനുഷ്യർ ഒന്നാണെന്നും മതവിദ്വേഷം സർവനാശകമാണെന്നും ബഹുവിധേന പഠിപ്പിക്കാൻ ശ്രമിച്ച അഹിംസയുടെ നാഥനെ കൊലചെയ്തത് ദീർഘനാളത്തെ ആലോചനയ്ക്കും ആസൂത്രണത്തിനുംശേഷമാണ്.

ഒരു വ്യക്തിയെ ഒന്നോ രണ്ടോ വ്യക്തികളോ ഒരുകൂട്ടമാളുകളോ കൊലചെയ്തതല്ല, മാനവസാഹോദര്യത്തിനായി തന്നെത്തന്നെ സമർപ്പിച്ച ഏറ്റവും ത്യാഗിവര്യനായ ലോകനായകനെ വർഗീയതയുടെ ഉന്മാദത്തോടെ കൊല്ലുകയായിരുന്നു. ഗാന്ധിജി ഒരു വ്യക്തിയല്ലെന്നതുപോലെ ഗോഡ്‌സെയും വ്യക്തിയല്ലെന്നാണ് അയാൾ ഇപ്പോഴും വിഗ്രഹവത്‌കരിച്ച് പൂജിക്കപ്പെടുന്നതിൽനിന്ന് വ്യക്തമാകുന്നത്.

ഇന്ത്യൻ ജനതയ്ക്കായി, സർവചരാചരങ്ങൾക്കുമായി സ്പന്ദിച്ച ആ നെഞ്ചകത്തിൽനിന്നും ചിന്തിയ ചോര 75 വർഷം കഴിഞ്ഞിട്ടും ഉണങ്ങാതെ ഈ മണ്ണിലുണ്ട്. മനുഷ്യരെ ഭിന്നിപ്പിക്കാനും സ്പർധവളർത്താനും വിദ്വേഷമുളവാക്കാനും ആരുതന്നെ ശ്രമിച്ചാലും പ്രതിരോധിക്കുന്ന, ഐക്യം വളർത്തുന്ന ഇന്ത്യയുടെ ഹൃദയമിടിപ്പാണ് ആ രക്തം.