ജീവിതം കത്തിച്ച വെളിച്ചത്തിലാണ് അവർ നമ്മെ ഊട്ടിയത്

January 31, 2023

ജീവിതത്തിന്റെയും ദർശനത്തിന്റെയും നാനാർത്ഥങ്ങൾ ഓരോ കാലഘട്ടത്തിലും വ്യത്യാസപ്പെടുന്നുണ്ട്. ശബരിമലയിലെ സ്ത്രീ പ്രവേശനം സംബന്ധിച്ച വ്യത്യസ്തമായ നിലപാടുകളാണ് കനകദുർഗ്ഗയിലേക്ക് എന്നെയെത്തിക്കുന്നത്.
പക്ഷേ സ്ത്രീ അനുഭവങ്ങളുടെ തീവ്രവും തീക്ഷണവുമായ തീച്ചൂളയിലേക്ക് തള്ളി മാറ്റപ്പെടുന്ന വ്യതിരക്തത ആ ജീവിതത്തെ സ്പർശിച്ചപ്പോൾ ഞാൻ അറിഞ്ഞു.
അതൊരു സമരത്തിൻറെ തുടർച്ചയാണ് അങ്ങനെയാണ് ഒരു സാമൂഹിക പ്രവർത്തകനെന്ന നിലയിൽ ഞാൻ ആ ജീവിതത്തെയും നിലപാടിനെയും വിലയിരുത്തുന്നത്.

     നവോത്ഥാനം നമ്മിൽ പലർക്കും കേവലം ഒരു വാക്കായി പരിണമിച്ചിട്ടുണ്ട് പുതിയകാലം നവോത്ഥാനത്തിന്റെ ഇടർച്ചകളിലാണ് അതിൻറെ മേച്ചിൻ പുറങ്ങൾ കെട്ടിയുയർത്തുന്നത്. ആശാൻ ചിന്താവിഷ്ടയായ സീത എഴുതുമ്പോൾ നവോത്ഥാനത്തിലേക്ക് നയിക്കുന്ന ചിന്തയുടെ കനലുകൾ അന്നത്തെ തലമുറയുടെ ഹൃദയത്തിൽ എരിഞ്ഞുകൊണ്ടിരുന്നു. മതങ്ങളും ജാതിയും ആചാരങ്ങളും തട്ടിമാറ്റി കേവലമായ മാനവികതയിലേക്ക് മനുഷ്യനെ വലിച്ചടുപ്പിച്ച ഒരു കാലത്തിൻറെ സൂര്യവെട്ടമണഞ്ഞുപോയെന്നും പുറത്ത് മടക്കത്തിന്റെ മുഴക്കങ്ങൾ മുഴങ്ങുന്നു എന്നും ചിലരെങ്കിലും തിരിച്ചറിയുന്നുണ്ട്. നവോത്ഥാനം ഒരു പ്രസംഗമോ ആചാരമോ വെളിപാടോ അല്ല. അത് കത്തിക്കരിഞ്ഞ ഒരു തലമുറയുടെ സമരജീവിതമാണ്. പുലയനോടൊപ്പം ഭക്ഷണം കഴിച്ചതിന് തിരുവനന്തപുരം മുതൽ കാസർഗോഡ് വരെ നിരന്തരമായി അപമാനിക്കപ്പെട്ട അയ്യപ്പൻ മാഷിൻറെ ജീവിതത്തിൻറെ വേവ് ആ തലയിലൊഴിക്കപ്പെട്ട ചാണക വെള്ളത്തിനൊപ്പം ഭൂമിയിലടർന്ന തീ ചൂടുള്ള കണ്ണീരാണ്.

വി.ടിയും എം.ആർ.ബി യും, ഇ എം എസും അങ്ങനെയങ്ങനെ എത്രയോ മനുഷ്യർ സ്വന്തം ജീവിതം കത്തിച്ച വെളിച്ചത്തിലാണ് അവർ നമുക്ക് അത്താഴം വിളമ്പിയതെന്ന് നാം മറന്നു പോകുന്നു.

  ഈ പുസ്തകം ശബരിമല സമരത്തെക്കുറിച്ചും വിവാദങ്ങളെ കുറിച്ചും ഉള്ള ഒരു പോസ്റ്റ്മാർട്ട്മല്ലi മറിച്ച് അമാവാസി രാത്രികളിൽ ചിറകടിച്ചു പറക്കുന്ന ഒരു മിന്നാമിന്നിയുടെ ഹൃദയവെട്ടത്തോടുള്ള  ഐക്യദാർഢ്യം. നവോത്ഥാനത്തെ വായിച്ചറിഞ്ഞ ഒരു രാഷ്ട്രീയ പ്രവർത്തകന്റെ ത്രസിക്കുന്ന ഹൃദയമിടിപ്പുകളുടെ താളം.
       ലോകം മുഴുവൻ പുതിയ സ്വപ്നം കാണുന്നുണ്ടെന്ന് നമുക്കറിയാം. നവോത്ഥാന വിചാരങ്ങൾ പലപ്പോഴും പഴയ സ്വപ്നങ്ങളുടെ പത്തായത്തിലാണ് സൂക്ഷിച്ചിട്ടുള്ളത്. പക്ഷേ അത് ഊർവരമായ മനുഷ്യർ പാർക്കുന്ന ഭൂമിയിലേക്കുള്ള വിത്തുകളാണ്.  ഒരു ചെറിയ മഴയിൽ ഒരു തലോടലിൽ പൊടിപ്പുമായി മുളച്ചു പൊട്ടാൻ വേണ്ടി കാലങ്ങളുടെ തപസ്സിൽ മുഖം പൂഴ്ത്തി കിടക്കുന്ന വിസ്ഫോടന ശേഷിയുള്ള ജീവിതത്തിൻറെ ആശയങ്ങൾ.

ഒരു സാമൂഹ്യപ്രവർത്തകന്, ചെറുത്തുനിൽപ്പിന്റെ ചെറുഗാഥകൾ ഉരുവിടുന്ന കനകദുർഗ്ഗ എന്ന സ്ത്രീക്ക് നവോത്ഥാനത്തിന്റെ കലപ്പയുയർത്താനവകാശമുണ്ട്.

    അതുകൊണ്ട് ഞാൻ മനുഷ്യനെപ്പോലെ സ്വപ്നം കാണുന്നുണ്ട്. കിളികൾ പാടുന്നുണ്ട്. സൂര്യനുദിക്കുന്നുണ്ട്. നവോത്ഥാന ധർമ്മങ്ങൾ വീണ്ടും വീണ്ടും ഉണരുന്നുണ്ട്. അതുകൊണ്ടുതന്നെ സമരം തുടങ്ങുന്നുമുണ്ട്.