വിവാഹ പ്രായം ഉയർന്നാൽ ലൈംഗിക അരാചകത്വം വർദ്ധിക്കുമോ ?

December 21, 2021

പെൺകുട്ടികൾക്ക് ഇരുപത്തിയൊന്ന് വയസ്സ് വിവാഹ പ്രായം എന്ന നിയമം വരുന്നത് സംബന്ധിച്ച് പലവിധ വാദങ്ങൾ ശ്രദ്ധയിൽ വന്നു. ഒന്നാമതായി കണ്ടത് പെൺകുട്ടികളുടെ വിവാഹ പ്രായം വർദ്ധിപ്പിക്കുക വഴി ലൈഗീകമായ അരാചകത്വം കൂടും എന്നുള്ളതായിരുന്നു.

മേൽപ്പറഞ്ഞ അഭിപ്രായത്തോട് ഒരു വിധ യോചിപ്പും തോന്നിയില്ല. വിയോചിപ്പിന് രണ്ട് കാരണങ്ങളാണ് ഉണ്ടായത്

1) ലൈംഗീക അരാചകത്വത്തിന് കാരണം പെൺകുട്ടികളാണ് എന്ന അപകടകരമായ ധ്വനി ആ പ്രസ്താവനയിൽ ഒളിഞ്ഞ് കിടപ്പുണ്ട്.

2) വിവാഹ പ്രായം ഉയർന്നാൽ ലൈംഗിക അരാചകത്വം വർദ്ധിക്കും എന്ന പ്രസ്താവനയിൽ കഴമ്പുണ്ടെങ്കിൽ നിലവിലെ അവസ്ഥയിൽ ലൈംഗീക അതിക്രമങ്ങൾ ഉണ്ടാകുവാനെ പാടില്ലായിരുന്നു. കൂടാതെ പെൺകുട്ടികളുടെ വിവാഹ പ്രായം നിലവിലുള്ളതിനേക്കാൾ കുറച്ചാൽ ഇനിയും ലൈംഗീക അതിക്രമങ്ങൾ കുറഞ്ഞേക്കുമെന്ന മറ്റൊരു വീക്ഷണത്തിനും ഇത് ലക്ഷ്യം വെക്കുന്നുണ്ട്. ലൈംഗീക സംതൃപ്തിക്ക് ഏറ്റവും വേഗത്തിൽ പെൺകുട്ടികളെ അനുവദിക്കണം എന്ന വികൃതമായ മനോനില മുകളിൽ പറഞ്ഞ പ്രസ്താവനയിലുണ്ട്. അതുകൊണ്ട് ഇത്തരം പ്രസ്താവനകളെ സമൂഹം കൂട്ടായി നിരാകരിക്കേണ്ടതുണ്ട്.

രണ്ടാമതായി ഉയർന്നു കേട്ട കാര്യമായിരുന്നു. വിവാഹം പ്രായം ഉയർത്തുന്നത് പെൺകുട്ടികളെ മൈനർ വൽക്കരിക്കാനുള്ള നടപടിയാണെന്നും, കൂടാതെ 18 വയസ്സ് കഴിഞ്ഞാൽ ക്രിമിനൽ ചട്ടമുൾപ്പടെയുള്ള ചട്ടങ്ങൾ മുതിർന്നൊരാൾക്കെന്ന നിലയിൽ ബാധകമാകുമ്പോൾ ജീവിതം തീരുമാനിക്കാനുള്ള അവകാശവും ലഭ്യമാക്കണം എന്നും. അല്ലാത്ത പക്ഷം ഇത് പെൺകുട്ടികളുടെ മൗലീക അവകാശങ്ങളുടെ ലംഘനമാകുമെന്നും.

രണ്ടാമതായി കേട്ട ഈ വാദഗതി തീർത്തും ഒരു തർക്കവാദമായി മാത്രമേ കാണാനാകു. നിലവിൽ പുരുഷന്മാരുടെ വിവാഹ പ്രായം 21 ആയി നിലനിൽക്കുകയാണ്. അവിടെ 18 മുതലുള്ള ക്രിമിനൽ ചട്ടങ്ങളുടെ ബാധകത്വം ചൂണ്ടികാണിച്ചോ അല്ലാതെയൊ പുരുഷന് മൗലീകവകാശങ്ങൾ ലംഘിക്കപ്പെട്ടതായി ആരും പറഞ്ഞ് കണ്ടില്ല. പുരുഷന്മാർക്ക് ലഭിക്കേണ്ട സമത്വത്തെക്കുറിച്ചും ചർച്ച ചെയ്യപ്പെട്ടില്ല. അതിനാൽ രണ്ടാമത്തെ വാദഗതിയും പൂർണ നിലവാരമുൾക്കൊള്ളുന്നതല്ല.

എന്നാൽ ഇതൊന്നുമല്ലാത്ത മൂന്നാമതൊന്നാണ് എന്റെ പക്ഷം. പ്രായപൂർത്തിയായാൽ ഇഷ്ടപ്പെട്ട പങ്കാളിയെ തിരഞ്ഞെടുക്കാം എന്ന വസ്തുത നിലനിൽക്കുന്ന ഘട്ടത്തിൽ വിവാഹ കാര്യത്തിൽ പ്രായപൂർത്തിയായ സ്ത്രീക്കോ പുരുഷനോ പ്രത്യേകം പ്രായപരിധി നിശ്ചയിക്കേണ്ടതില്ല. പ്രായപൂർത്തി നിർണയിക്കുന്നതിൽ ശാസ്ത്രീയമായ നിഗമനത്തിന്റെ അടിസ്ഥാനത്തിൽ അളവുകോൽ നിശ്ചയിക്കേണ്ടതുണ്ട് എങ്കിൽ അവിടെയാണ് മാറ്റം വരുത്തേണ്ടത്. ഇവിടെ ലൈംഗീക ബന്ധത്തിനുള്ള ലൈസൻസായാണ് വിവാഹത്തെ പരിഗണിക്കുന്നത്. ബിൽ അവതരിപ്പിക്കുന്നവരും വിമർശിക്കുന്നവരും ആ നിലയിൽ ഇക്കാര്യത്തെ കാണുന്നു. ലൈംഗീകതയെ കേവല സദാചാര ബോധ്യത്തോടെ നോക്കുന്നതിന്റെ പ്രശ്നമാണ് വിവാഹ പ്രായം എന്ന തർക്കത്തിനും പ്രശ്നത്തിനും കാരണം. ലൈംഗീകത ഒരു വ്യക്തിയുടെ സ്വകാര്യതയാണെന്നും, അതിൽ ഭരണകൂടത്തിനോ സമൂഹത്തിനൊ ഒരു ഇടപെടലിനും അധികാരവുമില്ലെന്നുള്ള യുക്തിയാണ് ഉണ്ടാകേണ്ടത്.

അങ്ങിനെയുണ്ടായാൽ ഈ ബില്ലുമുണ്ടാകില്ല ചർച്ചയുമുണ്ടാകില്ല.